ਵਾਸ਼ਿੰਗਟਨ ਡੀ. ਸੀ. ਗੁਰੂਘਰ ਵਿੱਚ ਗੁੰਬਦ ਦੀ ਪ੍ਰਵਾਨਗੀ ਮਿਲਣ ਤੇ ਸੰਗਤਾਂ ਵਿੱਚ ਖੁਸ਼ੀਆਂ

ਵਾਸ਼ਿੰਗਟਨ ਡੀ. ਸੀ. (ਗਿੱਲ) - ਵਾਸ਼ਿੰਗਟਨ ਡੀ. ਸੀ. ਦਾ ਗੁਰੂਘਰ ਸੰਸਾਰ ਦੀ ਰਾਜਧਾਨੀ ਦਾ ਅਜਿਹਾ ਸ਼ਿੰਗਾਰ ਹੈ ਜਿਸ ਨੂੰ ਵੱਖ-ਵੱਖ ਮੁਲਕਾਂ ਦੇ ਡੈਲੀਗੇਟਸ ਵੇਖਣ ਆਉਂਦੇ ਹਨ। ਜਿੱਥੇ ਇਹ ਗੁਰੂਘਰ ਵਾਸ਼ਿੰਗਟਨ ਡੀ. ਸੀ. ਵਿੱਚ ਇੱਕੋ ਇੱਕ ਸਿੱਖੀ ਦੀ ਪਹਿਚਾਣ ਹੈ, ਜਿਸ ਨੂੰ ਬਰਕਰਾਰ ਰੱਖਣ ਲਈ ਡਾ. ਦਲਜੀਤ ਸਿੰਘ ਸਾਹਨੀ ਦਾ ਅਥਾਹ ਯੋਗਦਾਨ ਹੈ। ਉਨ੍ਹਾਂ ਵਲੋਂ ਇਸ ਨੂੰ ਧਾਰਮਿਕ ਦਿਖ ਦੇਣ ਲਈ ਪਿਛਲੇ ਲੰਬੇ ਸਮੇਂ ਤੋਂ ਉਪਰਾਲੇ ਕੀਤੇ ਜਾ ਰਹੇ ਸਨ। ਜਿਸ ਨੂੰ ਉਸ ਸਮੇਂ ਬੂਰ ਪਿਆ ਜਦੋਂ ਵਾਸ਼ਿੰਗਟਨ ਡੀ. ਸੀ. ਦੇ ਬਿਲਡਿੰਗ ਮਹਿਕਮੇ ਨੇ ਇਸ ਦੀ ਧਾਰਮਿਕ ਦਿੱਖ ਨੂੰ ਪ੍ਰਵਾਨਗੀ ਦੇ ਦਿੱਤੀ ਗਈ। ਜਿਸ ਲਈ ਪ੍ਰਬੰਧਕਾਂ ਵਲੋਂ ਇਸ ਦੇ ਗੁੰਬਦ ਲਈ ਸੇਵਾ ਸ਼ੁਰੂ ਕਰ ਦਿੱਤੀ ਹੈ।

ਜ਼ਿਕਰਯੋਗ ਹੈ ਕਿ ਪ੍ਰਬੰਧਕਾਂ ਵਲੋਂ ਅਪੀਲ ਕੀਤੀ ਗਈ ਕਿ ਜਿਨ੍ਹਾਂ ਸੰਗਤਾਂ ਨੇ ਇਸ ਵਿੱਚ ਆਪਣੀ ਸੇਵਾ ਪਾਉਣੀ ਹੈ ਉਹ ਗੁਰੂਘਰ ਪ੍ਰਬੰਧਕਾਂ ਨਾਲ ਸੰਪਰਕ ਕਰਨ। ਪ੍ਰਬੰਧਕਾਂ ਦਾ ਕਹਿਣਾ ਹੈ ਕਿ ਇਸ ਗੁਰੂਘਰ ਉੱਤੇ ਜਦੋਂ ਗੁੰਬਦ ਸੁਸ਼ੋਭਿਤ ਹੋ ਗਿਆ ਤਾਂ ਇਸ ਗੁਰੂਘਰ ਦੀ ਦਿੱਖ ਇਕ ਅਜੂਬੇ ਵਜੋਂ ਨਜ਼ਰ ਆਵੇਗੀ। ਇਸ ਦੀ ਪ੍ਰਵਾਨਗੀ ਨਾਲ ਸੰਗਤਾਂ ਵਿੱਚ ਕਾਫੀ ਖੁਸ਼ੀ ਹੈ। ਸੰਗਤਾਂ ਇਸ ਨੂੰ ਅਧੁਨਿਕ ਦਿੱਖ ਦੇਣ ਲਈ ਵਿਉਂਤਬੰਦੀਆਂ ਵਿੱਚ ਰੁੱਝੀਆਂ ਹੋਈਆਂ ਹਨ। ਆਸ ਹੈ ਕਿ ਇਸ ਦੇ ਗੁੰਬਦ ਸੁਸ਼ੋਭਿਤ ਕਰਨ ਨਾਲ ਗੁਰੂਘਰ ਦੀ ਸੁੰਦਰਤਾ ਨੂੰ ਹੋਰ ਚਾਰ ਚੰਨ ਲੱਗਣਗੇ।