ਖਾਲਸਾ ਪੰਜਾਬੀ ਸਕੂਲ ਦੇ ਵਿਦਿਆਰਥੀ ਨੇ ਪਹਿਲੀ ਪਾਤਸ਼ਾਹੀ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਗੁਰਪੁਰਬ ਤੇ ਧਾਰਮਿਕ ਪ੍ਰੋਗਰਾਮ ਪੇਸ਼ ਕੀਤਾ

ਮੈਰੀਲੈਂਡ (ਫਲੋਰਾ) - ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦਾ ਪ੍ਰਕਾਸ਼ ਦਿਹਾੜਾ ਸਿੱਖ ਐਸੋਸੀਏਸ਼ਨ ਆਫ ਬਾਲਟੀਮੋਰ ਦੀ ਪ੍ਰਬੰਧਕ ਕਮੇਟੀ ਵਲੋਂ ਸੰਗਤਾਂ ਦੇ ਸਹਿਯੋਗ ਅਤੇ ਖਾਲਸਾ ਪੰਜਾਬੀ ਸਕੂਲ ਦੇ ਵਿਦਿਆਰਥੀਆਂ ਨਾਲ ਸਾਂਝੇ ਤੌਰ ਤੇ ਮਨਾਇਆ ਗਿਆ। ਜਿੱਥੇ ਆਸਾ ਦੀ ਵਾਰ ਦੇ ਕੀਰਤਨ ਭਾਈ ਬਖਸ਼ੀਸ਼ ਸਿੰਘ ਬਠਿੰਡਾ ਵਲੋਂ ਬਹੁਤ ਹੀ ਸ਼ਰਧਾ ਭਾਵਨਾ ਨਾਲ ਕੀਤੇ ਗਏ। ਭਾਈ ਸੁਰਜੀਤ ਸਿੰਘ ਹੈੱਡ ਗ੍ਰੰਥੀ ਵਲੋਂ ਇਸ ਅਵਸਰ ਤੇ ਖੂਬ ਧਾਰਮਿਕ ਵਿਚਾਰਾਂ ਦੀ ਸਾਂਝ ਪਾਈ ਗਈ। ਉਪਰੰਤ ਨਿਸ਼ਾਨ ਸਾਹਿਬ ਦੀ ਸੇਵਾ ਪੰਜ ਪਿਆਰਿਆਂ ਦੀ ਅਗਵਾਈ ਹੇਠ ਕੀਰਤਨ ਅਤੇ ਸ਼ਬਦ ਗਾਇਨ ਕਰਦੇ ਹੋਏ ਕੀਤੀ ਗਈ। ਨਿਸ਼ਾਨ ਸਾਹਿਬ ਦੇ ਚੋਲੇ ਦੀ ਸੇਵਾ ਸੂਰੀ ਪਰਿਵਾਰ ਵਲੋਂ ਕਰਵਾਈ ਗਈ। ਸੇਵਾ ਤੋਂ ਬਾਅਦ ਚਾਹ ਅਤੇ ਮਠਿਆਈ ਦੇ ਲੰਗਰ ਦੀ ਸੇਵਾ ਸੰਗਤਾਂ ਨੇ ਸੇਵਾ ਭਾਵਨਾ ਅਤੇ ਸ਼ਰਧਾ ਨਾਲ ਕੀਤੀ।
ਦੁਪਿਹਰ ਦੇ ਦੀਵਾਨ ਸਮੇਂ ਖਾਲਸਾ ਪੰਜਾਬੀ ਸਕੂਲ ਦੇ ਵਿਦਿਆਰਥੀਆਂ ਵਲੋਂ ਪ੍ਰੋਗਰਾਮ ਪੇਸ਼ ਕੀਤਾ ਗਿਆ, ਜਿਸ ਦਾ ਸੰਚਾਲਨ ਡਾ. ਸੁਰਿੰਦਰ ਸਿੰਘ ਗਿੱਲ ਸਕੂਲ ਦੇ ਮੁੱਖ ਸੇਵਾਦਾਰ ਵਲੋਂ ਤਰਤੀਬਵਾਰ ਪੇਸ਼ ਕੀਤਾ ਗਿਆ। ਜਿਸ ਵਿੱਚ ਸਭ ਤੋਂ ਪਹਿਲਾਂ ਅਵਨੀਤ ਕੌਰ ਨੇ ਗੁਰੂ ਨਾਨਕ ਦੇਵ ਜੀ ਦੀ ਜੀਵਨੀ ਤੇ ਚਾਨਣਾ ਪਾਇਆ ਅਤੇ ਉਹਨਾਂ ਵਲੋਂ ਚਾਰ ਦਿਸ਼ਾਵਾਂ ਵਿੱਚ ਕੀਤੀਆਂ ਉਦਾਸੀਆਂ ਦੀ ਜਾਣਕਾਰੀ ਦੱਸ ਕੇ ਆਪਣੀ ਹਾਜ਼ਰੀ ਲਗਵਾਈ। ਸਕੂਲ ਦੇ ਵਿਦਿਆਰਥੀਆ ਜਿਸ ਵਿੱਚ ਜਸਲੀਨ ਕੌਰ, ਮੇਹਰਵੀਨ ਕੌਰ, ਅਰਸ਼ਦੀਪ, ਦੀਪ ਅਸ਼ੀਸ਼ ਅਤੇ ਸਮੂਹ ਵਿਦਿਆਰਥੀਆਂ ਵਲੋਂ 'ਦੇਹ ਸ਼ਿਵਾ ਬਰ ਮੋਹਿ ਇਹੈ' ਦਾ ਸ਼ਬਦ ਉਚਾਰਨ ਕਰਕੇ ਬੋਲੇ ਸੋ ਨਿਹਾਲ ਦੇ ਜੈਕਾਰਿਆਂ ਨਾਲ ਸੰਗਤਾਂ ਨੂੰ ਨਿਹਾਲ ਕੀਤਾ। ਜਸਮੀਤ ਕੌਰ, ਮਨਰੀਤ ਅਤੇ ਨਿਮਰਤਾ ਕੌਰ ਨੇ 'ਗੁਰੂ ਨਾਨਕ ਦੇ ਬੱਚੇ ਹਾਂ' ਕਵਿਤਾ ਉਚਾਰਣ ਕਰਕੇ ਸੰਗਤਾਂ ਦੀਆ ਅਸੀਸਾਂ ਪ੍ਰਾਪਤ ਕੀਤੀਆ। ਬੀਬਾ ਲਿਵ ਕੌਰ, ਅਕਸ਼ਦੀਪ ਕੌਰ ਅਤੇ ਅਗਮਦੀਪ ਕੌਰ ਨੇ 'ਨਾਨਕੀ ਦਾ ਵੀਰ' ਕਵਿਤਾ ਸੁਣਾਈ ਅਤੇ ਸੰਗਤਾਂ ਤੋਂ ਵਾਹ ਵਾਹ ਖੱਟੀ। ਵੰਸ਼ਦੀਪ ਸਿੰਘ ਅਤੇ ਅੰਸ਼ਪ੍ਰੀਤ ਸਿੰਘ ਵਲੋਂ ਬਾਬੇ ਨਾਨਕ ਦੀਆ ਸਾਖੀਆਂ ਸੱਚਾ ਸੌਦਾ ਅਤੇ ਪਹਿਲੀਆਂ ਪੰਜ ਪਾਤਸ਼ਾਹੀ ਵਲੋਂ ਦਿੱਤੀਆਂ ਸਿੱਖਿਆਵਾਂ ਦੀ ਭਰਪੂਰ ਜਾਣਕਾਰੀ ਦਿੱਤੀ ਜੋ ਸੰਗਤਾਂ ਲਈ ਬਹੁਤ ਹੀ ਪ੍ਰੇਰਨਾ ਸਰੋਤ ਸਾਬਤ ਹੋਈਆਂ।
ਅਰਸ਼ਦੀਪ ਕੌਰ ਅਤੇ ਦੀਪ ਅਸੀਸ ਵਲੋਂ ਵੀ ਬਾਬੇ ਨਾਨਕ ਵਲੋਂ ਦਿੱਤੀਆਂ ਸਿੱਖਿਆਵਾਂ ਕਿਰਤ ਕਰੋ, ਨਾਮ ਜਪੋ ਤੇ ਵੰਡ ਛਕਣ ਅਤੇ ਕਿਰਤ ਕਰਨ ਦੀਆ ਜੁਗਤਾਂ ਜ਼ਿੰਦਗੀ ਦਾ ਅੰਗ ਬਣਾਉਣ ਤੇ ਜ਼ੋਰ ਦਿੱਤਾ। ਖਾਲਸਾਈ ਪੁਸ਼ਾਕਾਂ ਵਿੱਚ ਵਿਦਿਆਰਥੀ ਅਤੇ ਅਧਿਆਪਕ ਇੰਝ ਲੱਗ ਰਹੇ ਸਨ ਜਿਵੇਂ ਧਾਰਮਿਕ ਰਹੁਰੀਤਾਂ ਦਾ ਹੜ• ਆਇਆ ਹੋਵੇ। ਜਿੱਥੇ ਮਾਪੇ ਫੁੱਲੇ ਨਹੀਂ ਸਮਾ ਰਹੇ ਉੱਥੇ ਸੰਗਤਾਂ ਵੀ ਖਾਲਸਾ ਸਕੂਲ ਦੇ ਬੱਚਿਆਂ ਦੀ ਖਾਲਸਾਮਈ ਦਿਲਚਸਪੀ ਵੇਖ ਕੇ ਹੈਰਾਨ ਸਨ। ਭਾਵੇਂ ਖਾਸਲਾ ਪੰਜਾਬੀ ਸਕੂਲ ਦੀ ਉਮਰ ਛੋਟੀ ਹੈ ਪਰ ਇਸ ਵੱਲੋਂ ਪੁੱਟੀਆ ਜਾਂਦੀਆਂ ਪੁਲਾਂਘਾ ਸ਼ਲਾਘਾਯੋਗ ਹਨ। ਅਧਿਆਪਕ ਵਲੋਂ ਬਹੁਤ ਮਿਹਨਤ ਕਰਕੇ ਪੂਰੇ ਪ੍ਰੋਗਰਾਮ ਨੂੰ ਉਲੀਕਿਆ ਸੀ।
ਸਟੇਜ਼ ਤੋਂ ਸਕੱਤਰ ਮਾਸਟਰ ਧਰਮਪਾਲ ਸਿੰਘ ਵਲੋਂ ਬਹੁਤ ਹੀ ਸੋਹਣੇ ਸ਼ਬਦਾਂ ਵਿੱਚ ਬੱਚਿਆਂ, ਮਾਪਿਆਂ, ਵਿਦਿਆਰਥੀਆਂ ਅਤੇ ਪ੍ਰਿੰਸੀਪਲ ਖਾਲਸਾ ਪੰਜਾਬੀ ਸਕੂਲ ਦੀ ਸਰਾਹਨਾ ਕੀਤੀ ਗਈ। ਸਿੱਖ ਐਸੋਸੀਏਸ਼ਨ ਆਫ ਬਾਲਟੀਮੋਰ ਦੇ ਪ੍ਰਧਾਨ ਮੰਨਜੀਤ ਸਿੰਘ ਕੈਰੋ ਵੱਲੋਂ ਡਾਕਟਰ ਸੁਰਿੰਦਰ ਸਿੰਘ ਨੂੰ ਸਨਮਾਨਿਤ ਕਰਨ ਦੇ ਅਦੇਸ਼ ਤੇ ਹੈੱਡ ਗਰੰਥੀ ਸੁਰਜੀਤ ਸਿੰਘ ਵੱਲੋਂ ਸਿਰੋਪਾਉ ਪਾ ਕੇ ਸਨਮਾਨਿਤ ਕੀਤਾ। ਬੱਚਿਆਂ ਦੇ ਪ੍ਰੋਗਰਾਮ ਤੋਂ ਬਾਅਦ ਭਾਂਈ ਬਖਸ਼ੀਸ਼ ਸਿੰਘ ਬਠਿੰਡਾ ਦੇ ਜਥੇ ਨੂੰ ਬਾਬੇ ਨਾਨਕ ਦੀ ਬਾਣੀ ਨਾਲ ਖੂਬ ਨਿਹਾਲ ਕੀਤਾ। ਜਿੱਥੇ ਲੰਗਰਾਂ ਅਤੇ ਜਲੇਬੀਆਂ ਦੀ ਸੇਵਾ ਸਾਰਾ ਦਿਨ ਚਲਦੀ ਰਹੀ ਉੱਥੇ ਪ੍ਰਬੰਧਕਾਂ ਵਲੋਂ ਲਗਾਤਾਰ ਸੇਵਾ ਕਰਕੇ ਖੂਬ ਲਾਹਾ ਲਿਆ। ਸਮੁੱਚਾ ਦਿਹਾੜਾ ਗੁਰੂ ਨਾਨਕ ਦੇਵ ਜੀ ਦੇ ਪੁਰਬ ਨੂੰ ਸਮਰਪਿਤ ਅਥਾਹ ਛਾਪ ਛੱਡ ਗਿਆ। ਜਿਸ ਨੂੰ ਉਲੀਕਣ ਦਾ ਪ੍ਰਬੰਧ, ਚੇਅਰਮੈਨ, ਪ੍ਰਧਾਨ ਸਕੱਤਰ, ਕੈਸ਼ੀਅਰ ਤੋਂ ਇਲਾਵਾ ਕੁੱਝ ਪ੍ਰੀਵਾਰਾਂ ਦਾ ਭਰਪੂਰ ਯੋਗਦਾਨ ਰਿਹਾ ਸੀ।
 ਸੰਗਤਾਂ ਵੱਲੋਂ ਅਧਿਆਪਕਾ ਨੂੰ ਢੇਰ ਸਾਰੀਆ ਵਧਾਈਆ ਦਿਤੀਆ ਤੇ ਬਚਿਆ ਦੀ ਯੋਗ ਕਾਰਗੁਜ਼ਾਰੀ ਦੀ ਸ਼ਲਾਘਾ ਕੀਤੀ ਜੋ ਕਾਬਲੇ ਤਾਰੀਫ਼ ਸੀ। ਆਸ ਹੈ ਕਿ ਮਾਪਿਆ ਅਤੇ ਪ੍ਰਬੰਧਕਾਂ ਦੇ ਸਹਿਯੋਗ ਨਾਲ ਇਹ ਖਾਲਸਾ ਪੰਜਾਬੀ ਸਕੂਲ ਮੈਰੀਲੈਡ ਦਾ ਸਰਵੋਤਮ ਸਕੂਲ ਬਣੇਗਾ।