ਗੁਰਦੁਆਰਾ ਕਰਤਾਰਪੁਰ ਸਾਹਿਬ ਦੇ ਗੁੰਬਦ ਦੋ ਦਿਨਾਂ 'ਚ ਕਰ ਦਿੱਤੇ ਜਾਣਗੇ ਠੀਕ : ਐੱਫ. ਡਬਲਯੂ. ਓ.

ਭਾਰਤੀ ਮੀਡੀਆ ਝੂਠੀਆਂ ਖਬਰਾਂ ਫੈਲਾਉਣਾ ਛੱਡ ਪੱਤਰਕਾਰਤਾ ਦੇ ਅਸੂਲਾਂ ਤੇ ਪਹਿਰਾ ਦੇਵੇ : ਜੱਸੀ
ਵਾਸ਼ਿੰਗਟਨ ਡੀ. ਸੀ. (ਗਗਨ ਦਮਾਮਾ ਬਿਓਰੋ) - ਪਾਕਿਸਤਾਨ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਗੁਰਦੁਆਰਾ ਦਰਬਾਰ ਸਾਹਿਬ ਕਰਤਾਰਪੁਰ, ਜਿਸ ਨੂੰ ਕਰਤਾਰਪੁਰ ਸਾਹਿਬ ਵੀ ਕਿਹਾ ਜਾਂਦਾ ਹੈ, ਦੇ ਸਾਈਡ ਗੁੰਬਦਾਂ ਤੇ ਫੁੱਲਾਂ ਵਾਲੇ ਗਮਲਿਆਂ  ਨੂੰ ਨੁਕਸਾਨ ਪਹੁੰਚਿਆ ਹੈ
ਸੂਤਰਾਂ ਮੁਤਾਬਕ  'ਗਗਨ ਦਮਾਮਾ' ਅਖਬਾਰ ਦੇ ਮੁੱਖ ਸੰਪਾਦਕ ਨੇ ਪਤਾ ਕੀਤਾ ਕਿ  “ਪੰਜਾਬ ਪ੍ਰਾਂਤ ਵਿੱਚ ਤੇਜ਼ ਹਵਾਵਾਂ ਅਤੇ ਭਾਰੀ ਮੀਂਹ ਦੇ ਕਾਰਨ, ਦਰਬਾਰ ਸਾਹਿਬ ਕਰਤਾਰਪੁਰ ਵਿਖੇ ਦੋ ਗੁੰਬਦ ਐਟਰੀ ਵਾਲੀ ਸਾਈਡ ਵਾਲੇ ਡਿਗ ਗਏ ਹਨ। ਇਸ ਦੇ ਨਾਲ ਹੀ ਦਰਬਾਰ ਸਾਹਿਬ ਦੇ ਰਸਤੇ ਨੂੰ ਜਾਂਦਿਆਂ ਫੁੱਲਾਂ ਵਾਲੇ ਗਮਲੇ ਵੀ ਨੁਕਸਾਨੇ   ਗਏ ਹਨ।
ਡਾ. ਸਾਗਰਜੀਤ ਤੇ ਰਾਮ ਸਿੰਘ ਨੇ ਦਸਿਆ ਕਿ “ਫਰੰਟੀਅਰ ਵਰਕਸ ਆਰਗੇਨਾਈਜ਼ੇਸ਼ਨ (ਐੱਫ ਡਬਲਯੂ ਓ) ਨੂੰ ਗੁੰਬਦਾਂ ਦੀ ਤੁਰੰਤ ਮੁਰੰਮਤ ਨੂੰ ਯਕੀਨੀ ਬਣਾਉਣ ਲਈ ਕਾਰਜ ਸੌਂਪਿਆ ਗਿਆ ਹੈ। ਜਿਨਾ ਦਾ ਕਹਿਣਾ ਹੈ ਕਿ ਦੋ ਦਿਨਾਂ ਵਿਚ ਸਾਰੇ ਨੁਕਸਾਨੇ ਗੁੰਬਦ  ਦੇ ਕਾਰਜ ਨੂੰ ਪੂਰਾ ਕਰ ਲਿਆ ਜਾਵੇਗਾ। ਸਾਰਾ ਕੁਝ ਆਮ ਵਾਂਗ ਹੀ ਦਿਸੇਗਾ। ਉਹਨਾ ਅਫ਼ਸੋਸ ਜਾਹਿਰ ਕੀਤਾ ਕਿ ਭਾਰਤੀ ਮੀਡੀਆ ਬੇਤੁਕੀਆਂ ਖ਼ਬਰਾਂ ਚਲਾ ਕੇ ਗੁੰਮਰਾਹ ਕਰਨ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਜੋ ਚੰਗੀ ਗੱਲ ਨਹੀਂ ਹੈ।
ਇਨ੍ਹਾਂ ਰਿਪੋਰਟਾਂ 'ਤੇ ਪ੍ਰਤੀਕ੍ਰਿਆ ਜ਼ਾਹਿਰ ਕਰਦੇ ਹੋਏ, ਸਿੱਖਸ ਆਫ ਅਮਰੀਕਾ ਦੇ ਚੇਅਰਮੈਨ ਜਸਦੀਪ ਸਿੰਘ ਜੱਸੀ ਨੇ ਕਿਹਾ ਕਿ ਜ਼ਮੀਨੀ ਹਕੀਕਤ ਨੂੰ ਗਲਤ ਤਰੀਕੇ ਨਾਲ ਪੇਸ਼ ਕਰਨ ਵਾਲੇ ਮੀਡੀਆ ਤੇ ਵਰ੍ਹਦਿਆਂ ਕਿਹਾ ਕਿ ਸੰਵੇਦਨਸ਼ੀਲ ਧਾਰਮਿਕ ਮਾਮਲਿਆਂ 'ਤੇ ਮਾਮੂਲੀ ਮੁੱਦੇ ਨੂੰ ਸਨਸਨੀਖੇਜ਼ ਕਰਨਾ ਅੱਛੀ ਗੱਲ ਨਹੀਂ ਹੈ। ਉਹਨਾ ਕਿਹਾ ਕਿ ਮੀਡੀਆ ਦੇ ਕੁਝ ਹਿੱਸਿਆਂ ਵਿੱਚ ਮਾੜਾ ਰੁਝਾਨ ਹੈ, ਜੋ ਨਿੰਦਣਯੋਗ ਹੈ। ਕੁਦਰਤੀ ਆਫਤਾ ਨਾਲ ਅਕਸਰ ਬਿਲਡਿੰਗਾਂ ਨੂੰ ਨੁਕਸਾਨ ਪਹੁੰਚਦਾ ਹੈ। ਇਸ ਦਾ ਇਹ ਮਤਲਬ ਨਹੀਂ ਹੈ ਕਿ ਗਲਤ ਭੰਡੀ ਪ੍ਰਚਾਰ ਕੀਤਾ ਜਾਵੇ। ਅਸਲੀਅਤ ਜਾਣੇ ਬਗੈਰ ਹੀ ਭਾਰਤੀ ਮੀਡੀਆ ਗਲਤ ਰੋਲਾ ਪਾ ਰਿਹਾ ਹੈ। ਜੋ ਸ਼ੋਭਾ ਨਹੀਂ ਦਿੰਦਾ ਹੈ।