ਵਾਸ਼ਿੰਗਟਨ ਡੀ. ਸੀ. (ਗਿੱਲ) – ਸਿਖਸ ਆਫ ਅਮਰੀਕਾ ਸਿੱਖਾਂ ਦੀ ਐਸੀ ਸੰਸਥਾ ਹੈ ਜੋ ਸਿੱਖਾਂ ਦੀ ਪਹਿਚਾਣ ਦੇ ਨਾਲ ਨਾਲ ਉਨ੍ਹਾਂ ਦੀਆਂ ਸਮੱਸਿਆਵਾਂ ਨੂੰ ਸੁਲਝਾਉਣ ਲਈ ਅਹਿਮ ਰੋਲ ਨਿਭਾ ਰਹੀ ਹੈ। ਇਸ ਸਾਲ ਅਮਰੀਕਾ ਦੀ ਅਜ਼ਾਦੀ ਦਿਵਸ ਦੀ ਪਰੇਡ ਵਿੱਚ ਤੀਸਰੇ ਸਾਲ ਵੀ ਸਿੱਖੀ ਪਹਿਚਾਣ ਦਾ ਫਲੋਟ ਲੈ ਕੇ ਕੋਈ ਤਿੰਨ ਸੌ ਸਿੱਖਾਂ ਦਾ ਜਥਾ ਸ਼ਾਮਲ ਹੋ ਰਿਹਾ ਹੈ। ਜਿਸ ਲਈ ਸਾਰੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਹਨ। ਜਸਦੀਪ ਸਿੰਘ ਜੱਸੀ ਚੇਅਰਮੈਨ ਸਿਖਸ ਆਫ ਅਮਰੀਕਾ ਦੀ ਅਗਵਾਈ ਵਿੱਚ ਇੱਕ ਭਰਵੀਂ ਮੀਟਿੰਗ ਜੀਊਲ ਆਫ ਇੰਡੀਆ ਰੈਸਟੋਰੈਂਟ ਵਿੱਚ ਕੀਤੀ ਗਈ, ਜਿੱਥੇ ਹਰੇਕ ਪਹਿਲੂ ਨੂੰ ਵਿਚਾਰਿਆ ਗਿਆ ਅਤੇ ਮਾਰਸ਼ਲਾਂ ਨੂੰ ਹਦਾਇਤਾਂ ਜਾਰੀ ਕੀਤੀਆਂ ਗਈਆਂ ਹਨ।
ਪਰੇਡ ਦਾ ਮੁੱਖ ਮਕਸਦ ਸਿੱਖੀ ਪਹਿਚਾਣ ਨੂੰ ਅਮਰੀਕਾ ਦੀਆਂ ਬਰੂਹਾਂ ਅਤੇ ਉਨ੍ਹਾਂ ਦੇ ਮਨਾਂ ਵਿੱਚ ਵਸਾਉਣ ਲਈ ਦਸਤਾਰਧਾਰੀ ਸਿੱਖ ਅਮਰੀਕਨ ਝੰਡੇ ਦੇ ਰੰਗਾਂ ਦੀਆਂ ਪੁਸ਼ਾਕਾਂ ਨਾਲ ਸ਼ਾਮਲ ਹੋਣਗੇ। ਜਿੱਥੇ ਉਹ ਸਿੱਖਾਂ ਵਲੋਂ ਅਮਰੀਕਾ ਦੀਆਂ ਕਾਰਗੁਜ਼ਾਰੀਆਂ ਅਤੇ ਸੇਵਾਵਾਂ ਸਬੰਧੀ ਉਭਾਰਕੇ ਅਮਰੀਕਾ ਪ੍ਰਤੀ ਆਪਣਾ ਵਿਸ਼ਵਾਸ ਦ੍ਰਿੜਤਾ ਅਤੇ ਮਿਹਨਤ ਦਾ ਮੁਜੱਸਮਾ ਪੇਸ਼ ਕਰਨਗੇ।
ਸਿੱਖ ਫਲੋਟ ਰਾਹੀਂ ਸਿੱਖਾਂ ਦੀਆਂ ਅਮਰੀਕਾ ਵਿੱਚ ਪ੍ਰਾਪਤੀਆਂ ਦੀ ਝਲਕ ਨੂੰ ਪੇਸ਼ ਕੀਤਾ ਜਾਵੇਗਾ। ਉਪਰੰਤ ਪੰਜਾਬੀ ਸੱਭਿਆਚਾਰ ਦੇ ਰੰਗਾਂ ਨੂੰ ਭੰਗੜੇ ਰਾਹੀਂ ਬਿਖੇਰਿਆ ਜਾਵੇਗਾ। ਇਨ੍ਹਾਂ ਸਾਰੇ ਕਾਰਜਾਂ ਦਾ ਜਾਇਜ਼ ਅਤੇ ਪ੍ਰਬੰਧਾਂ ਨੂੰ ਅਮਲੀ ਜਾਮਾ ਪਹਿਨਾਇਆ ਗਿਆ ਹੈ।
ਇਸ ਪਰੇਡ ਵਿੱਚ ਵਿਸ਼ੇਸ਼ ਮਹਿਮਾਨ ਦੇ ਤੌਰ ਤੇ ਭਾਰਤ ਤੋਂ ਬਲਜੀਤ ਸਿੰਘ ਬਰਾੜ ਮੁੱਖ ਸੰਪਾਦਕ ਰੋਜ਼ਾਨਾ ਪੰਜਾਬ ਟਾਈਮ ਜਲੰਧਰ ਪੰਜਾਬ, ਪਾਕਿਸਤਾਨ ਤੋਂ ਰਮੇਸ਼ ਸਿੰਘ ਖਾਲਸਾ ਸਰਪ੍ਰਸਤ ਪਾਕਿਸਤਾਨ ਸਿੱਖ ਕੌਂਸਲ ਅਤੇ ਦਲਜੀਤ ਸਿੰਘ ਸੰਧੂ ਕੈਲੀਫੋਰਨੀਆਂ ਨੂੰ ਵਿਸ਼ੇਸ਼ ਸੱਦਾ ਦਿੱਤਾ ਗਿਆ ਹੈ। ਪਰੇਡ ਨੂੰ ਇਸ ਵਾਰ ਭਾਰਤੀ ਸਿੱਖ ਅਮਰੀਕਾ ਦੀ ਫੌਜ ਵਿੱਚ ਕਮਾਂਡਰ ਵਜੋਂ ਸੇਵਾ ਨਿਭਾਅ ਰਹੇ, ਮੇਜਰ ਕਲਸੀ ਖਾਸ ਮਹਿਮਾਨ ਹੋਣਗੇ। ਸਾਰੀ ਰੂਪਰੇਖਾ ਦੀ ਜਾਣਕਾਰੀ ਕੰਵਲਜੀਤ ਸਿੰਘ ਸੋਨੀ ਪ੍ਰਧਾਨ ਵਲੋਂ ਦਿੱਤੀ ਗਈ ਹੈ।
ਸਮੁੱਚੀ ਟੀਮ ਸਿਖਸ ਆਫ ਅਮਰੀਕਾ ਨੇ ਆਪਣੇ ਕਾਰਜਾਂ ਦੇ ਮੋਰਚੇ ਸੰਭਾਲ ਲਏ ਹਨ ਅਤੇ ਇਸ ਪਰੇਡ ਨੂੰ ਬੁਲੰਦੀਆਂ ਤੇ ਲਿਜਾਣ ਲਈ ਹਰ ਸੰਭਵ ਕੋਸ਼ਿਸ਼ ਕੀਤੀ ਗਈ ਹੈ। ਸਿਖਸ ਆਫ ਅਮਰੀਕਾ ਦੇ ਡਾਇਰੈਕਟਰ ਬਲਜਿੰਦਰ ਸਿੰਘ ਸ਼ੰਮੀ, ਮਨਪ੍ਰੀਤ ਸਿੰਘ ਮਠਾਰੂ, ਸੁਰਿੰਦਰ ਸਿੰਘ ਰਹੇਜਾ, ਬਖਸ਼ੀਸ਼ ਸਿੰਘ, ਚਤਰ ਸਿੰਘ, ਸੁਰਿੰਦਰ ਸਿੰਘ ਈ ਐੱਮ ਸੀ ਤੇ ਸਰਬਜੀਤ ਸਿੰਘ , ਬਖ਼ਸ਼ੀ ਤੋਂ ਇਲਾਵਾ ਸੁਰਮੁਖ ਸਿੰਘ ਮਾਣਕੂ, ਕੁਲਵਿਦਰ ਸਿੰਘ ਫਲੋਰਾ ਤੇ ਡਾਕਟਰ ਸੁਰਿੰਦਰ ਸਿਘ ਗਿੱਲ ਬਤੌਰ ਮੀਡੀਆ ਸ਼ਾਮਲ ਹੋਏ।