ਦਿੱਲੀ ਦੇ ਮੁੱਖ ਮੰਤਰੀ ਕੇਜਰੀਵਾਲ ਦੀ ਮੈਰੀਲੈਂਡ ਕਮਿਸ਼ਨਰ ਨਾਲ ਹੋਈ ਸਾਰਥਕ ਮਿਲਣੀ

ਵਾਸ਼ਿੰਗਟਨ ਡੀ. ਸੀ. (ਗ.ਦ.) - ਸਾਊਥ ਏਸ਼ੀਅਨ ਕਮਿਸ਼ਨਰ ਮੈਰੀਲੈਂਡ ਜਸਦੀਪ ਸਿੰਘ ਜੱਸੀ ਦੀ ਇੱਕ ਅਹਿਮ ਮੀਟਿੰਗ ਅਰਵਿੰਦ ਕੇਜਰੀਵਾਲ ਮੁੱਖ ਮੰਤਰੀ ਦਿੱਲੀ ਨਾਲ ਉਨ੍ਹਾਂ ਦੀ ਰਿਹਾਇਸ਼ ਤੇ ਹੋਈ ਹੈ। ਜਿਸ ਵਿੱਚ ਦਿੱਲੀ ਨੂੰ ਮੈਰੀਲੈਂਡ ਦੀ ਭਾਗੀ ਸਟੇਟ ਬਣਾਉਣ ਲਈ ਵਿਚਾਰ ਵਟਾਂਦਰਾ ਹੋਇਆ। ਜਿੱਥੇ ਜੈਸੀ ਸਿੰਘ ਨੇ ਮੈਰੀਲੈਂਡ ਸੈਕਟਰੀ ਸਟੇਟ ਦਾ ਪੱਤਰ ਕੇਜਰੀਵਾਲ ਨੂੰ ਅਰਪਨ ਕੀਤਾ ਅਤੇ ਦੋਹਾਂ ਸਟੇਟਾਂ ਦੇ ਅਦਾਨ-ਪ੍ਰਦਾਨ ਨੂੰ ਅੱਗੇ ਤੋਰਨ ਸਬੰਧੀ ਡੂੰਘੀ ਵਿਚਾਰ ਕੀਤੀ ਗਈ ਹੈ। ਜਸਦੀਪ ਸਿੰਘ ਨੇ ਕਿਹਾ ਕਿ ਪਹਿਲਾਂ ਅਜਿਹਾ ਪ੍ਰੋਜੈਕਟ ਪੰਜਾਬ ਨੂੰ ਸੌਂਪਿਆ ਗਿਆ ਸੀ, ਪਰ ਪੰਜਾਬ ਵਲੋਂ ਕੋਈ ਹੁੰਗਾਰਾ ਨਾ ਮਿਲਣ ਉਪਰੰਤ ਫੈਸਲਾ ਕੀਤਾ ਗਿਆ ਕਿ ਕਿਉਂ ਨਾ ਇਸ ਪ੍ਰੋਜੈਕਟ ਨੂੰ ਭਾਰਤ ਦੀ ਰਾਜਧਾਨੀ ਦਿੱਲੀ ਨਾਲ ਮਿਲਕੇ ਨੇਪਰੇ ਚਾੜ੍ਹਿਆ ਜਾਵੇ, ਜਿਸ ਨਾਲ ਦੂਜੇ ਪ੍ਰਾਂਤ ਮਾਡਲ ਵਜੋਂ ਸਮਝ ਕੇ ਆਪਣੀਆਂ ਸਟੇਟਾਂ ਨੂੰ ਅਜਿਹੇ ਪ੍ਰੋਜੈਕਟਾਂ ਅਧੀਨ ਲਿਆਕੇ ਪ੍ਰਾਂਤਾਂ ਦੀ ਬਿਹਤਰੀ ਕਰ ਸਕਣ।
ਜ਼ਿਕਰਯੋਗ ਹੈ ਕਿ ਕੇਜਰੀਵਾਲ ਦੇ ਸਾਰਥਕ ਵਿਚਾਰਾਂ ਅਤੇ ਦਿੱਲੀ ਨੂੰ ਅਧੁਨਿਕ ਸਟੇਟ ਵਜੋਂ ਬਣਾਉਣ ਸਬੰਧੀ ਇਸ ਪ੍ਰੋਜੈਕਟ ਨੂੰ ਪ੍ਰਵਾਨ ਕਰਦੇ ਹੋਏ ਇੱਕ ਕਮੇਟੀ ਗਠਿਨ ਕਰ ਦਿੱਤੀ ਹੈ ਜੋ ਮੈਰੀਲੈਂਡ ਅਤੇ ਦਿੱਲੀ ਸਬੰਧੀ ਸਿੱਖਿਆ, ਮੈਡੀਕਲ, ਟਰਾਂਸਪੋਰਟ ਅਤੇ ਵਪਾਰਕ ਖੇਤਰਾਂ ਦੀਆਂ ਲੋੜਾਂ ਨੂੰ ਮੁੱਖ ਰੱਖਕੇ ਮੈਰੀਲੈਂਡ ਨਾਲ ਸੰਧੀ ਕਰਨ ਨੂੰ ਤਰਜੀਹ ਦੇਣਗੇ। ਉਨ੍ਹਾਂ ਕਿਹਾ ਕਿ ਉਹ ਜਲਦੀ ਹੀ ਆਪਣੀ ਕੈਬਨਿਟ ਦਾ ਛੋਟਾ ਜਿਹਾ ਡੈਲੀਗੇਟ ਲੈ ਕੇ ਮੈਰੀਲੈਂਡ ਗਵਰਨਰ ਨਾਲ ਉਨ੍ਹਾਂ ਵਲੋਂ ਭੇਜੇ ਸੱਦੇ ਤੇ ਦੌਰਾ ਕਰਨਗੇ ਅਤੇ ਦਿੱਲੀ ਨੂੰ ਬਿਹਤਰ ਪ੍ਰਾਂਤ ਵਜੋਂ ਬਣਾਉਣ ਲਈ ਯੋਗਦਾਨ ਪਾਉਣਗੇ। ਉਨ੍ਹਾਂ ਮੈਰੀਲੈਂਡ ਸਟੇਟ ਵਲੋਂ ਭੇਜੇ ਦੂਤ ਜਸਦੀਪ ਸਿੰਘ ਦਾ ਧੰਨਵਾਦ ਕੀਤਾ ਅਤੇ ਇਸ ਪ੍ਰੋਜੈਕਟ ਨੂੰ ਨੇਪਰੇ ਚਾੜ੍ਹਨ ਦਾ ਭਰੋਸਾ ਦਿੱਤਾ ਹੈ।